Sergio Ramos është i bindur që Real Madrid nuk ka asnjë frikë nga ylli i Liverpool, Mohamed Salah. Kapiteni i gjigantëve spanjollë e thotë qartë që egjiptiani është “vetëm një nga 11 lojtarët”. Pavarësisht se 25-vjeçari ka bërë një sezon të shkëlqyer me fanellën e “The Reds”, ku ka shënuar 43 gola në të gjitha garat dhe i ndihmoi skuadrën të prekë finalen e 26 majit që do të zhvillohet në Kiev të Ukrainës.
Djemtë e Jurgen Klopp do të përballen me kampionët në fuqi të Champions League, të cilët synojnë të ngrenë trofeun e tretë radhazi dhe të trembëdhjetin në total. Edhe pse shumë media dhe analistë mendojnë se Salah do të sfidojë Cristiano Ronaldon për “Topin e Artë”, Ramos mendon ndryshe.
“E kemi parë çfarë ka bërë Salah këtë sezon, por ai për ne do të jetë vetëm një nga 11 lojtarët që do të jenë në fushë kur të luajmë kundër Liverpoo. Gjatë karrierës sime, kam hasur lojtarë më të mirë, shumë prej tyre që konsiderohen më të mëdhenjtë në botë. Për mua, nuk kemi asnjë frikë. Respekt, po, por kurrë frikë”- tha 32-vjeçari.
Fundi i kampionatit në Spanjë po afron me Barcelonën që ka siguruar titullin, ndërsa Reali nga ana tjetër është tepër i përqëndruar në një tjetër titull shumë më me rëndësi siç është ai i Champions League. Padyshim që “Los Blancos” ka bërë paraqitje fantastike në Champions këtë sezon, pasi arriti të kalojë me sukses çdo raund, duke eliminuar ekipe gjigante si Paris Saint-Germain, Juventus dhe Bayern Munich.
Për këtë Ramos është i bindur që do t’ja dalin me sukses të ngrenë trofeun e tretë radhazi në kryeqytetin ukrainas.
“Ne nuk mund të jemi arrogantë, por mund të jemi të sigurt. Ne e njohim mirë ADN-në e Real Madrid për të fituar Ligën e Kampionëve. Jemi të gatshëm për t’a mbrojtur këtë trofe për herë të dytë. Nuk do ta lejojmë që të na ikë nga duart lehtë. Me gjithë respektin, në fillim njerëzit mendonin që Liverpool nuk mund të arrinte deri këtu, në finale, por ata janë këtu sepse e meritojnë. Ne e dimë se me çfarë ekipi do të luajmë në finale dhe për këtë jemi të gjithë gati”- përfundoi ylli iberik.
Real Madrid – Liverpool do të luhet më 26 maj në stadiumin e Kievit. /EDS/