Europa bëhet gati për rinisjen e aktiviteteve futbollistike, pas pushimit të fundvitit. Nga Seria A dhe më veçanërisht te Lacio, pavarësisht afrimeve që mund të vijnë nga merkato e janarit, vështrimi ngelet te Valon Berisha.
Mesfushori i marrë nga Salzburgu u morr me bujë në verë, por ende nuk po arrin t’i tregojë aftësitë e tij. Kjo jo për faj të vetë futbollistit, por dëmtimeve që e kanë penalizuar atë. Në ato pak raste kur Berisha ka qenë në fushë, e ka gjetur mënyrën për të bërë dallimin e për të fituar besimin e tifozëve.
Megjithatë, këta të fundit nuk mund të durojnë pafundësisht dëmtimet që po e shoqërojnë karrierën e tij. Një prej mediave laciale, “Laziochannel”, e shpreh më së miri presionin që do e shoqërojë mesfushorin shqiptar gjatë kësaj kohe: “Si një riblerje duket afrimi i Valon Berishës, që erdhi me bujë nga Salzburgu. Deri tani nuk është dukur në fushë, për shkak të dëmtimeve. Ai duhet të tregojë se paratë e Tares nuk janë hedhur nga dritarja me të”, shkruhet në artikull, që pas pushimeve në Kosovë, duhet të ketë marrë energjitë e nevojshme për t’u përballur me një situatë aspak të lehtë. /Shqiperia.ch/