Një situatë që kurrsesi nuk mund të kuptohet lehtësisht është ajo te Atalanta, teksa vendin e titullarit në portën e këtij ekipi, e ka marrë këngëtari i “hip-hopit”, Gollini.
Një njeri me pasione të shumta, portieri italian që po zëvendëson Etrit Berishën, ka publikuar vetëm përpara disa kohësh edhe një këngë, duke treguar se ndodhet në lartësinë e duhur edhe jashtë fushës së blertë.
Megjithatë kjo situatë ishte e paralajmëruar për portierin shqiptar, teksa në fundin e sezonit të shkuar, Gasperini po i besonte portierit të ri. Fillimisht kjo dukej një zgjedhje e përkohshme e trajnerit të Atalantës, por që nuk rezultoi e tillë. Gollini ka qenë portieri titullar edhe në takimet e zhvilluara për këtë sezon, duke i konfirmuar Berishës sezonin e vështirë që do të kaloj në këtë vit futbollistik. /Shqipëria.ch/