“Ergys Kaçe do të mbledh valixhet që me ditën e parë, nuk do të ketë asnjë stërvitje me PAOK-un”, ky ishte opinioni i mediave në Shqipëri dhe Greqi pasi mesfushori shqiptar u kthye nga huazimi i Panathinaikosit. Faktikisht kjo histori do të ndodhte nëse nuk do të ndërrohej trajneri i kampionëve të grekëve.
Trajneri Ferrera mori drejtimin e PAOK dhe një nga dëshirat e tij ishte dhënia e kohës për Kaçen: “Më duhet ta shoh në përgatitje”. Ashtu edhe ndodhi, lojtari i Kombëtares e fitoi simpatinë e trajnerit portugez. Vendimi është marrë dhe mesfushori shqiptar pritet të jetë pjesë e ekipit grek edhe për sezonin e ardhshëm.
E papritura nuk përjashtohet në asnjë rast, pasi pikërisht në këtë mënyrë Kaçe ngeli ende pjesë e kësaj skuadre. Por trajneri Ferrera ka publikuar listën për turin e tretë të “Champions League” që do të luhet ndaj hirushes së “Champions League” në sezonin e shkuar, Ajaksit.
Ergys Kaçe është përfshirë në të dhe pritet të ketë minuta aktivizimi, me takimet që do të luhen në datat 6 dhe 13 gusht. /Shqiperia.ch/