Ermir Lenjani ka shënuar historinë e këtij sezoni në Zvicër gjatë ditës së djeshme, në atë barazim të Sionit ndaj Luzernit me rezultatin 2-2. Shansi i parë erdhi në sekondën e 10 të takimit dhe lojtari i Kombëtares arriti ta dërgojë topin në rrjetë.
E gjitha duket si një rastësi e bukur, por në fakt nuk ishte edhe aq. Trajneri i Sionit, Murat Yakin, ia kishte kërkuar skuadrës përpara ndeshjes krijimin e një rasti të tillë. “Trajneri na tha që ta godisnim topin menjëherë drejt sulmit sapo e nisëm ndeshjen”, u shpreh Ermir Lenjani pas ndeshjes. Ashtu edhe ndodhi, teksa pas një topi të gjatë nga fusha e Sionit, do të vinte edhe goli i Lenjanit. Sigurisht, një realizim në atë sekondë të ndeshjes kërkon edhe fatin më vete, që këtë herë i buzëqeshi lojtarit të Sionit. /Shqiperia.ch/