Ndonjëherë veprimet që ne ndërrmarim, kryen në disa rrethana të caktuara dhe askush nuk duhet të na gjykojë për to, fundja ne e dimë më mirë historinë e rrjedhjes së ngjarjeve, pasi është jeta është e jona dhe e askujt tjetër. Shpeshherë jemi ne ata që gabojmë, duke gjykuar në disa raste futbollistë që nuk e meritojnë, për zgjedhjet e kryera nga ana e tyre.
Shumë fjalë dhe polemika janë thënë edhe për Milot Rashicën. Mënyra sesi ai e la Shqipërinë për shkak të mos thirrjes në Europian, ishte sjellja e një adoleshenti që merr shpejt “flakë”, e kurrsesi nuk mund të linte një shije të mirë te tifozët shqiptarë.
E megjithatë, të paktën Rashica shkoi te Kosova, sërish në trevat tona. Këtë herë flasim për një moment përulje, teksa talenti shqiptar ka treguar me krenari në mediat gjermane se Kosova dhe Shqipëria janë një.
“Ishte fitorja e parë zyrtare kështu që mendoj se ishte e mrekullueshme për të gjithë lojtarët, por Kombëtaren tonë, për tifozët që erdhën të na shikojnë. Bëmë histori, mendoj se ishte një moment i paharrueshëm për vendin tone.
Ndeshja kundër Ishujve Faroe ishte ndeshje e veçantë, por jo vetëm për mua, për të gjithë sepse ishte edhe ndeshja e parë si vendas pas dy viteve, më parë kemi luajtur në Shqipëri. Edhe atje ndihemi si në shtëpinë tonë, sepse ne jemi si vëllezër, jemi një.
Por, ishte shumë larg për ne dhe për tifozët që të udhëtojnë dhe të na ndjekin në Shqipëri. Tani mund të luajmë në vendin tonë, para tifozëve tanë, para familjeve tona, në një stadium të ri, atmosfera ishte jashtëzakonshme. Atë mbrëmje stadiumi ishte i stërmbushur, natë fantastike”, ka thënë Rashica. /Shqipëria.ch/