Muslija dhe Rexhbecaj janë padyshim dy futbollistët shqiptarë më të mirë të momentit në Bundesligë. Të dy në moshë të re dhe që premtojnë aq shumë për të ardhmen e tyre. E megjithatë, nëse në javën e kaluar futbollistët në fjalë do të ishin titullarë me skuadrat e tyre, përkatësisht me Hanoverin dhe Wolfsburgun, kjo nuk ndodh në këtë javë të kampionatit.
Disi e çuditshme pasi lojtarëve iu besua në ndeshje akoma më delikate në javën e shkuar, atje ku u përballën me Bajern Mynchen dhe Leverkusen, ndërsa sot e nisin nga pankina. Muslija i ka bindur të gjithë me golat dhe nivelin e treguar në ato pak raste kur ka luajtur. Megjithatë në takimin ndaj Augsburgut, do të përdoret si një “as” nën mëngë për trajnerin, duke e mbajtur në stol për pjesën e dytë.
Nga ana tjetër, ulja në stol e Rexhbecaj ishte disi më e pritshme, pasi talenti shqiptar nuk u ngrit në lartësinë e kundërshtarit të gjigandëve bavarezë në ndeshjen e fundit. /Shqiperia.ch/