Nuk kanë kaluar shumë minuta nga mbyllja e votimeve dhe përzgjedhjeve në UEFA, në kongresin që është mbajtur në ditën e sotme në Romë.
Atje është shënuar edhe historia e futbollit shqiptar, pasi për herë të parë do të kemi një zë të fuqishëm në Komitetin Ekzekutiv të UEFA-s. Presidenti i Federatës Shqiptare të Futbollit, Armando Duka, ka arritur të fitojë në këtë garë, që kishte një konkurrencë të fortë dhe sigurisht shumë lakmi.
Kjo për shkakun se nga Komiteti Ekzekutiv i UEFA-s kalojnë të gjitha vendimet më të rëndësishme të futbollit. Përfaqësimi me një anëtar në organin më të lartë të futbollit, është padyshim një luks i madh për secilin vend në Europë, e jo më nëse flasim për Shqipërinë. Tashmë ka edhe më shumë shpresa, që e ardhmja e futbollit shqiptar të jetë edhe më e ndritur, në bazë të një mbështetje më të madhe e të pakursyer që mund të vijë në UEFA.
Kjo ishte hera e dytë që Armando Duka konkurronte për një mandat të tillë, por sigurisht që nuk bëhet fjalë për ndonjë dhuratë të ofruar këtë herë. Nga 10 kandidaturat për 8 vënde, mes të cilave 1 prej tyre ishte dedikuar për një figurë femërore, Duka ka arritur të grumbulloj 36 vota në gjithsej. Shqipëria e ka merituar një përfaqësim të tillë, pasi hapat e hedhura ndër vite janë të mëdha, për ta nisur që nga fushat e terrenet sportive, e për ta përmbyllur me sukseset e ekipeve shqiptare në tërësi apo edhe ekipin Kombëtar. Europa e sheh me një sy tjetër tashmë Shqipërinë, e për këtë arsye një përfaqësim i yni në një tavolinë të përbashkët me vendimmarrjen kryesore të futbollit europian, ishte mëse i pritshëm. /Shqiperia.ch/