Në momente të caktuara dhe vështirësie, të shumtë janë njerëzit që e mendojnë dorëzimin si rrugën më të lehtë, për të dalë nga pozita në të cilën gjenden. Por raste të tilla, si ai i Kantes, na bën të mendojmë më gjatë, për të kuptuar vetë thelbin e jetës.
Kjo është historia e një njeriu që gjendej mes skamjes në Paris, ndërsa prindërit e tij kishin emigurar nga Mali. Në kohën kur Franca festonte Botërorin e fituar në vitin 1998, Kante do të ishte duke mbledhur sendet e hedhura nga tifozët gjatë festimit.
Në këtë mënyrë do të dërgonte disa të holla minimale në shtëpi, por të mjaftueshme për të ndryshuar sadopak gjendjen. Kështu pasi bën punë nga më të rëndomtat për të mbajtur gjallë veten dhe familjen, vendos t’i bashkohet një klubi periferik në Paris.
Është më i vogli në skuadër por kjo nuk ka rëndësi për të, ndërsa puna e madhe dhe dëshira për të ecur përpara, bën që të gjithë trajnerët e tij të ngelin gojëhapur. Çfarë është ky njeri? Kulmi i tij do të ishte te Leicester, atje ku së bashku me “hirushen” do të bënin surprizën dhe historinë më të madhe në historinë e futbollit.
Klubi që pretendohej për të rënë nga kategoria, papritur fitonte “Premier League”, ndërsa Kante cilësohej si njeriu me një mushkëri më tepër. Chelsea kurrsesi nuk mund të linte t’i ikte një futbollist i tillë nga duart, ndërsa për Kanten duket se nuk ndryshon asgjë.
I njëjti futbollist, me të njëjtën modesti dhe thjeshtësi. Madje edhe buzëqeshja nuk largohet kurrë nga fytyra e tij, aqsa është kthyer edhe në një objekt diskutimi për shumë njerëz. Por fundja, nëse ka qenë e pranishme edhe në ditët e tij më të vështira, nuk ka sesi të largohet në ato më të lumturat. Jeta, duhet marrë thjeshtë si Kante, me thjeshtësi, modesti, shumë punë dhe…buzëqeshje. Asgjë nuk është aq serioze sa mendohet. /Shqiperia.ch/