Florian Kamberi është një sulmues me shumë potencial dhe që Shqipërisë aktuale i mungon jo pak. Aktualisht me skuadrën e Hibernianit në Skoci, sulmuesi shqiptar është një yll në skuadrën e tij dhe ka gjithë vëmendjen e skuadrave të njohura në Europë.
Afrimi i tij te Shqipëria është parë si i pamundur, jo për interesimin e munguar nga ana e Federatës, por për vetë dëshirën e lojtari. Ai ishte në pritje të ftesës së Zvicrës, ndërsa në 26 ndeshje të këtij sezoni, ka realizuar 9 gola dhe ka dhënë 5 pasime vendimtare.
Por nëse më parë sulmuesi i Hibernianit shihej si një mision i pamundur për Shqipërinë, tashmë situata duhet të ketë ndryshuar disi. Kontaktet e shpeshta mes Eros Grezdës dhe Florian Kamberit, mund të ndryshojnë edhe vendimin e këtij të fundit, që ende nuk është grumbulluar nga Kombëtarja e madhe e Zvicrës.
Së fundmi vetë Kamberi ka postuar një foto së bashku me Grezdën në “Instagram”, duke i bashkangjitur flamurin shqiptar. Ardhja e tij te kombëtarja shqiptare do të ishte një sukses më vete, ndërsa sulmuesi 23-vjeçari mund të nënshkruaj për Celtic në janar dhe do të ishte një vlerë e madhe për kuqezinjtë. /Shqiperia.ch/
