Prej disa vitesh në Itali është përfolur për një kalim të Kristian Panuçit në krye të skuadrës së Romës. Midis tyre ka një histori dashurie të vjetër, pasi trajneri aktual i Shqipërisë, vitet më të arta në karrierën e tij si futbollist i ka kaluar pikërisht në këtë ekip.
Shumë kohë më përpara, kur Panuçi ishte ndihmës trajner tek kombëtarja e Rusisë, ekipi i kryeqytetit italian pati kontakte për ta marrë në krye të pankinës, por që nuk arriti të finalizohej një marrëveshje konkrete. Madje kjo gjë ka ndodhur 2 herë brenda pak kohësh.
Jo më larg sesa një javë më parë, Panuçi u përfol sërish se mund të ishte në krye skuadrës së Romës, por përpara se ta bënte këtë gjë duhet të hiqte dorë nga Shqipëria. Mesa duket nuk është e thënë se e treta është gjithmonë e vërteta, pasi italiani ka një kontratë me një Kombëtare që pak nga pak po e dashuron dhe po e ndjen ashtu siç duhet, pavarsisht rezultateve zhgenjyese.
Gjatë gjithë kësaj kohe Panuçi është shprehur se nuk do të largohet nga kuqezinjtë pa lënë gjurmë, ndërsa një gjë e tillë do të shënonte edhe kulmin e tij në karrierën e trajnerit. Eleminatoret e Europianit vijnë shumë shpejt dhe tashmë është koha që Panuçi të tregojë aftësitë e tij, pasi ky mund të jetë edhe shanci i tij i fundit për të përmbushur misionin e tij tek Shqipëria. /Shqiperia.ch/