Praktikisht vetëm emri i kishte mbetur Dinamos së Bukureshtit në Rumani. Kjo skuadër kishte kaluar shumë lëkundje gjatë kohëve të fundit, aqsa për një moment shkoi edhe në zonën e ftohtë të kampionatit.
Gjithçka i përket së shkuarës, pasi ekipi i Rednik ka marrë fitoren e dytë rradhazi. Këtë herë përballë Sepsit, ekipi ku gjendet edhe Naser Aliji, ka fituar me rezultatin 0-1. Një tjetër super paraqitje e mbrojtësit shqiptar, që i ka dhënë një dorë e madhe shokëve të skuadrës, në këtë fitore me mjaft vlerë.
Mediat rumune e kanë ngritur në piedestal Alijin, duke u shprehur se ka qenë në formë fantastike ndaj Sepsit, ndërsa përtej mbrojtjes gjendej i gatshëm për të ndihmuar edhe sulmin. Një metamorfozë është ajo që shohim në mbrojtjen e Rednik, që mes ndryshimeve të mëdha në këtë vit futbollistik, po merr më të mirën prej tyre. Aliji debutoi në javën e shkuar me ekipin e njohur rumun, duke sjell menjëherë nivelin pozitiv dhe 3 pikët e munguara në kampionat. /Shqiperia.ch/