Përpara takimit ndaj Shqipërisë, atëherë kur Izraeli sapo kishte dalë nga triumfi ndaj Skocisë me rezultatin 2-1, trajneri i saj Herzog shprehej:
“Skocia më pëlqeu, sepse pas shënoi një gol, vazhdonte të luante përpara dhe na lejoi të luanim futboll. Në Shqipëri na ndodhi e kundërta, pasi ata shënuan, u kthyen që të gjithë në mbrojtje. Kështu, nuk mundnim ti gjenim hapësirat për të shënuar”.
Në vendin tonë ekziston një shprehje e saktë që mund të përshkruaj këtë rast: “Bëni si them unë, por asnjëherë si bëj unë”. Kjo është ajo se çfarë Herzog shpreh me veprimet e tij, teksa Izraeli në fushën e lojës gjatë mbrëmjes së djeshme, ishte pikërisht ai ekipi që vetë trajneri “kritikonte” përpara disa orëve.
Një gol i shënuar me dinakëri në fillimin e lojës dhe një skuadër e kthyer e gjitha mbrapa, për të pritur Shqipërinë dhe për të testuar nervat tona. Kjo ishte ajo se çfarë u pasqyrua në një takim që fati shpeshherë, i kombinuar me mungesën e paaftësisë tonë për të shënuar në portën kundërshtare, bëri që Izraeli të dukej si një skuadër e madhe. /Shqiperia.ch/