Elseid Hysaj nuk është duke kaluar kohë të mira te Napoli, pavarësisht se Ançeloti po i jep më tepër hapësirë dhe besim mbrojtësit shkodran. Kjo skuadër është surprizuar nga Xhenoa në shtëpi me rezultatin 1-1, ndërsa miqtë luajtën edhe me një lojtar më pak për shumë minuta.
Menjëherë pas përfundimit të ndeshjes, trajneri Ançeloti ia ka adresuar gjithë fajin vetëm mbrojtjes. “Gjithçka fillon nga baza dhe problemet tona janë në mbrojtje. Nuk ka funksionuar ashtu siç duhet ndaj Xhenoas. Vuanim shumë në qendër me rrezikshmërinë e Pandevit. Kjo është një situatë alarmante në prag të ndeshjes me Arsenalin”, do të shprehej tekniku italian, ndërsa Napoli sfidon anglezët në javën e ardhshme për “Europa League”.
Ndërkohë që reagim të ashpër ndaj Hysajt kanë tifozët e Napolit. Media pranë këtij klubi, “ArenaNapoli”, përmbledh gjithë thirrjet në një zë të këtyre tifozëve: “Shiteni urgjentisht Hysajn! Në këtë mënyrë kemi për t’i pësuar tre gola me Arsenalin”. /Shqiperia.ch/