Trajneri shqiptar, Ismet Munishi, ka folur për median prestigjoze skoceze “Daily Record”. Në mënyrë të veçantë është diskutuar sa i përket përballjes së mundshme mes Prishtinës dhe Rangersit, në turin e dytë kualifikues të “Europa League”.
Për të mbërritur deri këtu, skuadra në Kosovë duhet të eliminoj modestët e St Joseph. Munishi ia ka bërë të qartë skocezëve se nuk do e kenë turizëm udhëtimin e tyre për t’u ndeshur me Prishtinën, madje duke i folur edhe shanset e eliminimit të cilat ekzistojnë për gjigandët e Rangersit që drejtohet nga Gerrard, megjithëse duken të vogla.
“Prishtina ka bërë disa nënshkrime shumë të mira në merkato. Ata kanë marrë lojtarët më të mirë të Llapit, Drenicës dhe Dritën. Do e mundin shumë lehtë St Joseph, këtu nuk ka asnjë diskutim. Pastaj do të mendojnë për Rangersin dhe mënyrën sesi do të kualifikohen. Prishtina është e mbushur me besim dhe unë besoj se mund të fitojnë me skocezët. Do të ishte rezultati më historik në historinë e futbollit tonë”, ka thënë Ismet Munishi. /Shqiperia.ch/