Një befasi e madhe ishte ajo e ditës së djeshme për tifozët e Ostendes, të cilat nuk panë sulmuesin që gjithmonë është aktivizuar si titullar këtë sezon, Sidrit Guri, që të ishte në 11-cen e parë kundër St.Truiden në atë humbje me rezultatin 1-0.
Por trajneri belg i Ostendes, Gert Verhejen, ka sqaruar gjithçka duke u shprehur se kjo zgjedhje e tij nuk ishte e rastësishme. Ai kërkonte t’i hiqte sulmuesin barrën e përgjegjësisë së madhe që ndjen, ndërsa shprehet se Guri ka ndryshime të mëdha nga ai lojtar që luante në Shqipëri më parë.
“Kërkova të heq trysninë e madhe nga shpatullat e Gurit, pasi ai nuk është lojtari që ne kemi parë në Shqipëri. Tashmë shihet qartësisht sesi ky lojtar po kërkon të marrë më tepër peshë në shpatullat e tij”, ka thënë Verhejen. /Shqipëria.ch/