Sa shumë që eksperimentojnë futbollistët shqiptarë në klubet e tyre. Pasi Taulant Xhaka u kthye në një qendërmbrojtës nga ana e trajnerit të Bazelit, ishte radha që Ermir Lenjani të përfundonte në sulmues me Sionin.
Për më tepër, futbollisti shqiptar ka shkëlqyer në këtë pozitë të re, që nuk e kishte luajtur asnjëherë në karrierën e tij. Lenjanin e kemi parë shpeshherë mes mbrojtjes dhe mesfushës, por jo si sulmues të deklaruar.
Megjithatë futbollisti i Shqipërisë ka qenë më i miri në takimin mes St Gallen dhe Sion, ndeshje e fituar në minutat shtesë me rezultatin 1-2, pasi koha e rregullt përfundoi në barazim 1-1. Të dyja golat për Sionin i shënoi Kasami, falë pasimeve vendimtare të ardhura nga Ermir Lenjani. /Shqiperia.ch/