Armando Sadiku është vërtet i pafat sa i përket dëmtimeve të pësuara dhe ka humbur edhe njëherë Kombëtaren. Megjithëse mungon një konfirmim zyrtar, situata është shumë e qartë. Malaga ka dalë me një deklaratë vetëm para pak minutash, duke konfirmuar një problem muskulor në pjesën e mbrapme të këmbës së majtë të Sadikut.
Pikërisht ky shqetësim bëri që sulmuesi shqiptar të largohej në minutat e fundit në ndeshjen e kaluar. Malaga ende nuk e ka zbardhur të gjithë problemin dhe kohën që ky futbollist do të qendrojë jashtë fushës, por mendohet për disa javë dhe e ka të humbur përfshirjen në Kombëtare. Tashmë është Armando Broja që pritet të marrë vendin e Sadikut në listën e parë të Shqipërisë sa i përket dy ndeshjeve të fundit të kualifikueseve.