Një tripletë e shënuar në ditën e djeshme dhe Lirim Kastrati rikthehet në vëmendjen e mediave, për të qenë futbollisti më i përfolur. Në Kroaci flitet për një kampionat të fortë dhe shënimi i golave nuk është i lehtë.
Pastaj të flasim për tre të tillë, është një histori më vete. Interesimi për Kastratin nga ana e Shqipërisë dhe Kosovës ka qenë i pranishëm shumë kohë më parë, aqsa situata ka shkuar deri aty, në të paktat raste, kur ka pasur edhe konfrontim në distancë.
Lirim Kastrati ka lindur në Kosovë, ndërsa është formuar te Shkëndija e Tiranës. Ai u ftua edhe te U-19 e Shqipërisë, por askush nuk ishte i bindur tek talenti i djaloshit. Pas shumë kohësh, sulmuesi do të zgjonte interesimin e kuqezinjve.
Këtë herë do të ishin mediat në Kosovë ato që do të alarmoheshin, që FSHF po bën gjithçka të jetë e mundur, për të marrë Kastratin në Kombëtare. Madje duke i shkelur edhe vijat e rregullave, pasi për ta bërë këtë FSHF kishte nisur përqeshjet ndaj nivelit të Kosovës, për atë që kjo përfaqësuese mund të jetë në të ardhmen, kjo e thënë po sipas mediave kosovare.
Megjithatë kjo është çështje që i përket të kaluarës, Kastrati është pjesë e grup-moshave të Kosovës, ndërsa e gjitha ajo çfarë ndodhi në ditën e djeshme, do të na bëj të mësojmë diçka më shumë në ditët në vazhdim, se për cilën Kombëtare apo përfaqësuese Kastrati do të luajë. Nuk duhet të harrojmë, përpara disa kohësh u përfol se futbollisti shqiptar kishte edhe interesimin e Kroacisë. /Shqipëria.ch/
