Kuqezinjtë do të luajnë takimin e fundit të “Ligës së Kombeve” ndaj Skocisë, për të përmbyllur kështu një aventurë të gjatë, që ka aq shumë për t’u përmirësuar dhe për t’u rikthyer pas në kohë.
Trajneri Panuçi duket se e ka të qartë formacionin për takimin e sotëm në mbrëmje, për të gjetur mënyrën sesi mund të surprizohen skocezët. Nuk ka vend për shumë ndryshime apo eksperimente, teksa ideja për të luajtur me tre mbrojtës, nuk do të provohet as në këtë ndeshje.
Mbrojtja do të jetë e përbërë nga Veseli, Gjimshiti, Mavraj dhe Binaku, ndërsa i vetmi dyshim mund të jetë përfshirja e Ismajlit në qendër të mbrojtjes për të larguar ndonjë prej titullarëve aktualë.
Nga ana tjetër, mesfushë i takon Kaçes, Xhakës, Memushajt, Uzunit dhe Grezdës, që praktikisht duhet të jetë edhe arma më e fortë e kuqezinjve. Nëse i shohim të gjithë këto emra, këta janë edhe futbollistët më në formë të Shqipërisë në nivel klubesh. Porta dhe sulmi nuk kanë vend për dyshime, pasi i përkasin Strakoshës dhe Balajt, megjithëse për këtë të dytin, më shumë sesa një zgjedhje e Panuçit është një zgjidhje e tij duke parë rrethanat ku ndodhet. /Shqiperia.ch/