Shqipëria do të ndeshet në datën 17 nëntor ndaj Skocisë, për të luajtur takimin e fundit të vlefshëm për “Ligën e Kombeve”. Një ndeshje kjo që do të ketë jo pak rëndësi për kuqezinjtë, që duhet të bëjnë autokritikën pas disa rezultateve aspak pozitive.
Sipas asaj që raporton “Panorama Sport”, sa i përket stërvitjeve që Panuçi po kryen dhe skemave që po përdor, sipas të gjitha gjasave në Shkodër do të realizojë dëshirën e tij, për të pasur 3 mbrojtësa. Kombëtarja mund të nis nga minuta e parë me këtë skemë, ndërsa në prapavijë nuk pritet të ketë vend për Mavrajn.
Strakosha është titullari i vetëm i garantuar, ndërsa përpara tij rreshtohet Ismajli, Gjimshiti dhe Binaku. Për të vazhduar me krahët e mesfushës është Uzuni dhe Grezda që do të jenë rrezikshmëri për kundërshtarët, ndërsa mesfushën e ngjeshur e plotësojnë Lilaj, Kaçe, Xhaka dhe Memushaj.
Në majën e sulmit do të jetë sërish Balaj, por këtë herë më shumë sesa për një vend të merituar, qendron për shkak të mungesës së konkurrencës. /Shqiperia.ch/