Milani ka hequr dorë përfundimisht nga talenti me origjinë shqiptare, Ismet Sinani. Ky i fundit do të bënte një zhurmë të madhe në mediat shqiptare teksa luante me të rinjtë e kuqezinjëve. Disa gola të bukur dhe video në “Youtube”, tregonin se flitej për një lojtar të jashtëzakonshëm.
Derisa trajneri Erjon Bogdani doli me një pohim që asokohe u duk i çuditshëm për të gjithë, duke u kritikuar pafundësisht, se Sinani nuk mund të quhej talent. Kjo pasi sulmuesi shqiptar luante vetëm disa minuta te Milani dhe nuk kishte besimin e klubit.
Kështu edhe ndodhi, fillimisht Sinani u huazua te Juve Stabia, ndërsa ditët e fundit u kthye sërish në Milanelo. Nuk zgjati shumë kjo kohë, me mediat italiane që raportojnë se kuqezinjtë e kanë shitur këtë lojtar te Sicula Leonzio në Serinë C.
Për të folur saktësisht është një huazim me të drejtë blerje në fund, por është konsideruar si i tillë në media pasi duket se klubi i njohur italian ka hequr përfundimisht dorë nga Sinani. Vetë lojtari ka postuar edhe një foto në “Instagram” me Andre Silvën, si një kujtim nga ajo eksperiencë e paharruar. /Shqiperia.ch/
