Tashmë është një çështje totalisht e mbyllur, Albian Ajeti e ka bërë zgjedhjen e tij, ajo është Zvicra. Pavarësisht shpresave që u rritën së tepërmi në kohët e fundit për Shqipërinë apo Kosovën, që vëllai i Arlind Ajetit të zgjidhte një prej tyre, e vërteta doli komplet tjetër.
Zvicra e la jashtë listës së Botërorit, nëse do të ishin kuqezinjtë, sigurisht që Ajeti do e kishte menduar disi largimin, por me helvetët, sigurisht që jo. Këto fjalë i thotë vetë sulmuesi i Bazelit. Në një intervistë për mediat zvicerane, pas atij goli të shënuar ndaj Islandës, Albiani shprehet:
“Jam zhvilluar shumë në anën fizike si futbollist por edhe në atë psikologjike. Pasi shënova me Zvicrën, isha mbushur plot me emocione. I përgjigjem shumë mesazheve të urimit sa herë që zgjohem në mëngjes, pas atij debutimi fantastik. Sigurisht që kam ende mesazhe pa u kthyer përgjigje.
Për mua, nuk ka qenë kurrë një temë e rëndësishme ajo e diskutimit të ekipit kombëtar. Kjo pasi Zvicrën e kam dashur gjithmonë, madje që nga viti 2011”, ka përfunduar Albian Ajeti.
Por ajo që vlen për t’u theksuar, është morali që bënte vëllai i Albianit, Arlindi, kur ai vinte në Kombëtaren tonë, që futbollistët shqiptarë të zgjidhnin gjithmonë Shqipërinë, sepse Zvicra apo një tjetër përfaqësuese nuk do t’i falte të njëjtat emocione.
“Talentet shqiptare që kanë mundësi të luajnë për Zvicrën apo për përfaqësuese të tjera evropiane, duhet ta kuptojnë se askund nuk do t’i përjetojnë emocionet që të jep fanella kuqezi, prandaj u them që nuk duhet të hezitojnë për të pranuar ftesën për të luajtur me Shqipërinë”, përfundonte Arlindi, por ndërkohë misioni i tij dështon brenda familjes. /Shqipëria.ch/