Këtë fundjavë kampionati shqiptar ul siparin e tij përsa i përket përballjeve për vitin futbollistik 2018. Tashmë është zyrtare që kampion dimri në “Superligën Shqiptare” është skuadra e Partizanit. Ndonëse ka edhe një sifdë për të zhvilluar, ekipi i drejtuar nga Skëndër Gega udhëheq kampionatin me 3 pikë më shumë se vendi i dytë që mbahet nga skuadra e Teutës.
Ditën e dielë, “demat”, përballen në transfertën e vështirë të Gjirokastrës ku në këtë sfidë do të kërkojnë një rezultat pozitiv, për të vazhduar ecurinë e tyre të fitoreve. Duket se kampionatit shqiptar i është rikthyer ta udhëheq një skuadër legjendë siç është ajo e Partizanit, teksa këta të fundit do të përpiqen të rikthejnë në shtëpinë e tyre trofen e munguar prej vitesh, atë të titullit kampion. Një skuadër e shndërruar duket kjo aktualja me Skënder Gegën, që më parë ka drejtuar edhe Shpresat e Shqipërisë.
Tekniku shqiptar duket se e ka gjetur formulën për t’i dhënë suksesin e kërkuar kryeqytetasve, e deri tani “ilaçi” funksionon në mënyrën më të mirë të mundshme. Terreni është shtruar edhe nga forma negative e kundërshtarëve direkt, teksa Teuta dhe Skënderbeu janë ndalur në takimet e tyre të fundit. Duke marrë të mirëqenë një fitore të Kukësit ndaj Kastriotit, nëse Partizani do të fitonte me Luftëtarin, do të shkëputej me 5 pikë diferencë nga ndjekësi më i afërt. /Shqiperia.ch/