Ardian Ismajli nuk i ka shpëtuar operimit, teksa në ditën e djeshme është shtruar me urgjencë në spitalin e Splitit. “Shqiperia.ch” ka mësuar se mjekët e spitalit ishin duke bërë gjithçka që ky rast të kalohej pa operacion, pas dhimbjeve të mëdha që futbollisti shqiptar ndiente në stomak, por një gjë e tillë nuk u arrit.
Gjithsesi lutjet për mbrojtësin e Kombëtares janë shpërblyer, pasi sipas asaj që mësojmë pranë lojtarit, operimi i kryer në orën 13:00 të ditës së sotme ka përfunduar me sukses. Ky mbetet një lajm i mirë për Panuçin dhe Shqipërinë, që në ndeshjet e nëntorit fituan një siguri në prapavijë me ardhjen e Ismajlit.
Tashmë pritet që futbollisti i Hajdukut të dalë në stërvitje me skuadrën e tij gjatë muajit janar, për të punuar shumë e për të qenë gati në takimin që Shqipëria do të zhvillojë ndaj Turqisë në muajin mars, sa i përket kualifikueseve të Europianit. /Klaudio Ndreca- Shqiperia.ch/