Kosova ka thyer me rezultatin e thellë 0-5 ekipin e Maltës. Të karikuar deri në limite, djemtë e Shaland arritën të zhvillojnë një lojë fantastike. Po aq fantastike ishte edhe paraqitja e disa lojtarëve si Rashica, Kololli, dhe Avdiaj. Kosova vulosi gjithçka në pjesën e dytë duke rrëmbyer kreun e tabelës. Në përfundim të ndeshjes, strategu i kësaj përfaqësueseje mjaft premtuese ka analizuar çdo episodë të lojës së luajtur, ndërsa është shprehur se fitorja e djeshme u arrit duke kujtuar sfidën e parë kundër Maltës, atë në stadiumin “Fadil Vokrri” të Prishtinës
“Jam shumë i lumtur me performancën. Pjesa e parë ishte e mirë, por Malta luajti në mbrojtje dhe nuk ishte e lehtë të gjendej hapësira. Kishim mundësi për të shënuar dhe për të përfunduar ndeshjen, por e kujtuam ndeshjen e parë në Prishtinë dhe ekipi arriti që ta ruajë vëmendjen e duhur në lojë. Ekipi luftoi shumë dhe intensiteti ishte shumë më i lartë se në ndeshjen ndaj Ishujve Faroe. Ishte shumë me rëndësi të shënonim 5 gola sepse kemi pasur probleme në ndeshjet e para kur nuk kemi konkretizuar rastet.
Kur pamë shortin në grup në Prishtinë, dhe zbuluam se kundërshtar do ta kishim Azerbajxhanin, në mendjen time kisha përshtypjen se kjo do të ishte finalja e grupit. Tani është ndeshje e madhe pë ne, për ekipin dhe duhet të tregojmë se çfarë mund të bëjmë. Azerbajxhani është ekip i vështirë me lojtarë të mirë. Kam besim në ekipin tim dhe mendoj se do të jetë një ndeshje shumë emocionuese në Prishtinë, për të gjithë tifozët në Kosovë”- përfundoi Shaland./Shqiperia.ch/