Thomas Strakosha është një nga portierët më të mirë jo vetëm në kampionatin italian, por është vlerësuar edhe si një ndër më të talentuarit në Europë. Gardiani i portës së Shqipërisë është komentuar nga shumë figura të njohura të futbollit botëror, por tashmë duket se është koha të vlerësohet edhe nga “rivali” i tij.
Në një intervistë për median “Lazionews”, portieri i dytë i skuadrës së Lacios, Silvio Proto, është shprehur me superlativa për kolegun dhe shokun e tij të skuadrës, Thomas Strakosha. Silvio ka treguar se është i vetëdijshëm që tek Lacio do të ishte një portier i dytë, pasi gardiani kuqezi është shumë produktiv. Gjithashtu Proto është shprehur se Strakosha është ende shumë i ri dhe me këtë ritëm që po tregon tek lacialët, i ka të gjitha mundësitë për të arritur majat në karrierën e tij.
“Gjithçka ishte e qartë që në fillim. Unë do të isha portier i dytë pas titullarit, Thomas Strakosha. Nuk kam parë kurrë një portier më të fortë deri sa erdhi ai. Shqiptari është i ri, rezultativ dhe gjithashtu është shpërthyes. Ka të gjithë mundësitë për të bërë një karrierë që të arrijë majat”, është shprehur portieri 35-vjeçar i Lacios, Silvio Proto, i cili ka shumë vite karrierë në majat e Europës, duke luajtur për Anderlehtin, Olimpiakosin dhe për kombëtaren belge në disa takime./Shqiperia.ch/