Mirlind Daku është padyshim një nga prodhimet më të mira të futbollit të Kosovës, ndërsa e ardhmja e këtij sulmuesi duket e garantuar. Flasim për një futbollist që kulmin e formës deri më tani, e kapi te Llapi. Menjëherë u vu re forma e tij dhe potenciali i madh që zotëron, ndërsa tashmë është pjesë e Osijekut në Kroaci.
Aktualisht në ekipin e dytë, por objektivat e lojtarit shkojnë shumë më shumë sesa paraqitja me ekipin e parë të klubit, ku ka qenë pjesë edhe Eros Grezda. Shqipëria gjatë periudhës së fundit vuan shumë në pjesën sulmuese, ndërsa një lojtar si Daku vetëm do t’i pasuronte organikën Panuçit.
Futbollisti i lindur në Gjilan, është pjesë e Shpresave të Kosovës, ndërsa në një prononcim ekskluziv dhënë për “Shqiperia.ch”, nuk përjashton mundësinë e një shqyrtimi të situatës, nëse kombëtarja shqiptare do të interesohej për të.
“Ambientimi ka shkuar shumë mire te Osijeku, këtu më kanë pritur jashtëzakonisht mirë në klub. Jam i kënaqur me të gjithë, për momentin aktivizohem në ekipin e dytë të Osijek, por për momentin objektivi im është të arrij formën optimale dhe të kaloj në ekipin e parë. Ndryshimet mes dy shteteve është se këtu ka një lloj profesionalizmi, gjë e cila mungon në Kosovë dhe po ashtu edhe në Shqipëri.
Sa i perket Kombëtares, për momentin nuk mund të jap ndonjë përgjigje, por pse jo edhe nëse më vjen një ofertë nga Shqipëria, do e shqyrtoja. Megjithatë tani jam pjesë e U-21 të Kosovës dhe është ëndërr që të prezantoj shtetin tim.
Momentalisht jam i fokusuar të luaj për klubin e Osijekut dhe të vazhdoj që të punoj për të kapur formën më të mirë. Tifozët e Kosovës dhe të Shqipërisë duhet të jenë gjithmonë të bashkuar sepse ne jemi një shtet me të gjitha qytetet e tjera shqiptare që janë për rreth nesh.
Përpara pranimit të Kosovës të gjithë kemi brohoritur për Shqipërinë dhe tifozët duhet t’i vazhdojnë t’i perkrahin të dyja përfaqësueset. Kjo sepse nëqoftëse Kosova apo Shqipëria arrijnë sukses, do të krenohet e gjithë shqiptaria. Ne kemi një gjak, një gjuhë dhe një komb. Rroftë Shqiptaria!”, ishte mënyra sesi Daku mbylli prononcimin e tij. /Klaudio Ndreca- Shqiperia.ch/