Për herë të parë në drejtimin e trajnerit Kovaç, Meritan Shabani më në fund i bashkohet ekipit të parë të Bajernit. Talenti shqiptar do të jetë me gjigantët bavarezë, në takimin e sotëm që skuadra e njohur gjermane do të zhvillojë për Kupë ndaj Rodinghausen.
Gjithçka është zyrtarizuar në ditën e djeshme, teksa së bashku me Meritan Shabanin, kanë udhëtuar nga ekipi i të rinjve edhe Christian Früchtl, Woo Yeong Jeong dhe Paul Will. Futbollisti shqiptar e ka bërë debutimin e tij në Bundesligë në kohën e Heynkes, ndërsa edhe Ançeloti i ka besuar në fushën e lojës me ekipin e parë.
Por në drejtimin e Kovaç, Shabani kishte kohë që nuk vinte në skuadrën bavareze sa i takon një takimi zyrtar, pasi në stërvitje i është bashkuar shpeshherë. I gjendur përballë presionit të tifozëve dhe medias gjermane që e kërkonte me ngulm shqiptarin, trajneri kroat nuk mund të merrte një tjetër vendim.
Tashmë është Shabani që duhet të tregojë sesa shumë vlen dhe nëse arrin të kthehet në protagonist gjatë ditës së sotme, atëherë mund të sigurojë një qëndrim edhe për ndeshjet e kampionatit. Një gjë është e sigurt, të gjithë do të ngelen gojëhapur nga ky lojtar, madje edhe vetë Kovaç. /Shqiperia.ch/