Milot Rashica është një nga futbollistët shqiptarë më premtues për të ardhmen, teksa luan edhe në një nga kampionatet më të forta në Europë, në atë gjerman.
I ardhur nga stoli në takimin e fundit në Bundesligë, mesfushori i Verderit shënoi një kryevepër nga goditja e dënimit, për të tërhequr edhe njëherë vëmendjen e mediave gjermane rreth tij. Legjenda e Shqipërisë dhe menaxheri i futbollistit, Altin Lala, në një intervistë për “Telesport” është shprehur se lojtari nuk e di se çfarë potenciali zotëron.
“Për mendimin tim, Miloti, ia ka thënë edhe trajneri i vet, edhe unë, nuk është i qartë se sa i fortë është, se çfarë potenciali ka. Pavarësisht se ka ardhur dy herë nga pankina, njëherë kundër Hanoverit dhe pastaj kundër Frankfurtit, në 45 minuta lojëka shënuar një gol dhe ka dhënënjë asist.
E ka ndihmuar skuadrën po themi me tri pikë më shumë, sepse në ndeshjen e parë ishte duke humbur, ndërsa në ndeshjen e dytë ishte barazim. Ai me ato pak minuta që ka pasur në dispozicion, ka bërë diferencën. Edhe lojtarët e klubit, edhe trajnerët që i njoh të dy, më thonë se ka kualitetet të jashtëzakonshëm. Ka nevojë edhe për pak më tepër ambientim në Bundesligë.
Këtu është një ligë shumë dinamike në krahasim me ligat e tjera, vetëm Premier Liga mund t`i afrohet. Është shumë dinamike, nuk ke gjysmë sekondi pushim gjatë lojës. Edhe kur del topi jashtë, duhet të kesh kujdes se fillon loja sërish. Vetëm kur ke ndonjë korne, apo ndonjë ence, merr pak frymë. Ndryshe, është ligë shumë intensive. Aty duhet të ambientohet pak më tepër, porthem se Miloti është djalë i zgjuar dhe ka kualitet të jashtëzakonshëm”, ka thënë Lala. /Shqipëria.ch/