Rreth 6 vite kontribut për fanellën e Kukësit, mesfushori Besar Musolli ishte kthyer padyshim në ikonën e këtij klubi.
Tek verilindorët do të kishte lëvizje të mëdha thuajse në çdo sezon, por pavarësisht të gjithave, Musolli do të ishte gjithmonë pjesë e skuadrës. Në vitin 2012, ky lojtar kaloi nga KF Hysi, për t’iu bashkuar Kukësit. Falë performancave të zhvilluara në Shqipëri, Besari arriti të fitojë edhe fanellën e Kosovës, duke u grumbulluar me përfaqësuesen e dardanëve.
E megjithatë, koha e ndarjes erdhi dhe ndoshta nuk ishte ajo që të gjithë prisnin. Pas dëmtimit të rëndë që Musolli pësoi ndaj Teutës, që e lë 6 muaj jashtë fushës së blertë, Kukësi njofton prishjen e kontratës me futbollistin, duke surprizuar jo pak ambientin sportiv. Enigmë ngelet arsyeja e prishjes së kontratës, por e vetmja gjë e sigurt, është fakti që ky futbollist meritonte më tepër mbështetje në këtë moment të vështirë që ndodhet, për hir të kontributit që ka dhënë gjatë gjithë këtyre viteve. /Shqiperia.ch/