Azdren Llullaku ka përsëritur grindjen e Kavanit me Nejmarin në Rumani, duke pasur keqkuptime me shokun e skuadrës për një penallti. Sulmuesi shqiptar do të realizonte nga pika e bardhë vetëm sa për statistika, pasi Astra humbi ndaj Klujit me rezultatin 1-5.
Futbollisti shqiptar e mori ekzekutimin që duhej ta bënte sulmuesi qendror i Astras, Denis Alibec. Ky i fundit madje kërkoi të dilte nga fusha e lojës në shenjë proteste, por u rikthye sërish për të vazhduar lojën. Të paktën Llullaku nuk do të gabonte nga penalltia, megjithëse Alibec nuk gëzoi aspak për realizimin e shqiptarit dhe shfaqi gjatë gjithë kohës nervozizëm.
“Ka shumë nerva në këto moment. Ishte një gjë e vogël. Tani e mora unë dhe herën tjetër do e marrë Alibeci ekzekutimin, kaq ishte e gjitha”, tha Llullaku për të zbutur situatën. Por i këtij mendimi nuk është presidenti i Astras, Dani Coman, që paralajmëron dënimin e lojtarit shqiptar: “Nuk e di sesi ishin vendimet e trajnerit dhe nuk dua të flas pa e njohur situatën. Këtu ka disa rregulla dhe kush nuk i respekton ato, paguan. Llullaku do ta paguajë nëse nuk e ka respektuar fjalën e trajnerit”, ka thënë Koman. /Shqiperia.ch/