Etrit Berisha është fajësuar disi për atë humbje të Shqipërisë të marrë ndaj Islandës në transfertë me rezultatin 1-0. Gjithmonë detyra e portierit duket e lehtë në pamje të parë, por faktikisht ndonjëherë duhet të kapërdijë edhe vlerësime të pamerituara.
Ashtu si edhe në takimin e djeshëm, atje ku gardiani i Kombëtares nuk mund të bënte diçka më tepër në rastin e golit. Por nga ana tjetër, ajo ishte gjuajtja e parë në portë nga dy në total që do të bënin futbollistët e Islandës.
Statistikat e rëndojnë së tepërmi, ndërsa ish-portieri i Shqipërisë, Orges Shehi, e ka marrë në mbrojtje me deklaratën e dhënë për “Supersport”: “Për mua ishte totalisht i pafajshëm. Futbollistin kundërshtar e kishte 7 metra larg dhe është thuajse e pamundur që të reagosh aty. Më mirë çfarë mund të bënte Berisha në atë rast? Ndoshta vetëm një mrekulli”, ka thënë Shehi. /Shqiperia.ch/