Vedat Muriqi në këtë sezon ka qënë një sulmues rezultativ si me përfaqësuesen e Kosovës ashtu edhe me klubin e tij aktual të Rizesportit, që është pjesë e kampionatit turk. Këtë vit, 24 vjeçari i ka treguar të gjithëve potencialin e tij, ndërsa kjo gjë nuk do të kalonte lehtë pa u vënë re edhe nga klubet më të mëdha në Turqi.
Pak ditë më parë në mediat turke u përfol për një interesim të gjigandëve të Gallatasarait për të marrë shërbimet e sulmuesit dardanas. Kjo skuadër gjithashtu ishte konkrete në dëshirën e saj për Vedatin, kjo e pohuar edhe nga vetë protagonisti në fjalë. Ndonëse ishte një ofertë e mirë edhe për vetë lojtarin, skuadra e Rizesporit e ka refuzuar për arsye se të paktën deri në fund të sezonin dëshirojnë që Muriqi të jetë pjesë e tyre.
Në një intervistë për mediat turke të sulmuesit dardanas, ai pranoi se skuadra e Gallatasarait kishte insistuar për të marrë shërbimet e tij që në këtë merkato. Muriqi gjithashtu theksoi faktin se skuadra e tij aktuale e pengoi kalimin e tij tek gjigandët turk të Gallatasarait, e në mënyrë të habitshme duke u shprehur i lumtur për ekipin ku ndodhet, pa asnjë hatërmbetje, megjithëse i mohuan kalimin e karrierës.
“Gallatasarai më bëri ofertë dhe më kërkoi në merkato, por dëshira e klubit tim ishte të mos vazhdohej më tej me tratativat. Megjithatë jam i lumtur dhe dua të ngre ekipin aktual atje ku i takon”, u shpreh Vedat Muriqi për mediat turke. /Shqiperia.ch/