Përfundon pezullimi 2-vjeçar, Dinamo përforcohet me një shqiptar para Skënderbeut

Dinamo e Zagrebit përforcohet me një futbollist shqiptar, përpara duelit në fazën “play-off” të Ligës së Europës me Skënderbeun. Bëhet fjalë për mesfushorin Arijan Ademi, i cili rikthehet pas dy viteve pezullim nga UEFA.

26-vjeçari, që ka mbajtur edhe shiritin e kapitenit te gjigandëve kroatë, përfundoi pezullimin, pasi ishte dënuar për shkak se rezultoi pozitiv në testet antidoping.

Fillimisht ai u pezullua për 4 vite, por kohëzgjatja u ul nga Apeli në 2 vjet. Ademi është rikthyer dje në stërvitje me skuadrën, ndërsa klubi kishte ftuar tifozët ta mirëprisnin ish-kapitenin në stadiumin “Maksimir”.

Kjo ishte një mënyrë për t’i treguar mesfushorit me origjinë shqiptare, por të lindur në Kroaci, se ai mbetet një pjesë e rëndësishme e Dinamos së Zagrebit.

Që prej vitit 2014, Ademi përfaqëson Maqedoninë në arenën ndërkombëtare, teksa nuk është përfolur asnjëherë për të luajtur me Shqipërinë.

Gjasat janë të pakta që ai të aktivizohet në ndeshjen ndaj Skënderbeut, edhe pse në gjithë këtë periudhë pezullimi, Ademi është stërvitur rregullisht me skuadrën ku ka qenë lider. /Panoramasport

About the author