Emanuel Ndoj ka arritur një sukses të jashtëzakonshëm në Serinë B, pasi me ekipin e Breshias, e ka siguruar që prej disa kohësh ngjitjen në elitën e futbollit italian. Një festë më vete kjo për mesfushorin shqiptar, që ngjitet në Serinë A pikërisht me skuadrën që i ka besuar kaq shumë gjatë gjithë kësaj periudhe.
Por shanset janë të mëdha që Ndoj të ndërroj skuadër në merkaton e verës, pavarësisht kësaj arritje të Breshias. Kjo pasi Sampdoria po e kërkon me ngulm lojtarin e Kombëtares prej disa kohësh. “Blucerchiando” rithekson faktin se lojtari në fjalë është si objektiv kryesor për merkaton e Sampdorias, që aktualisht ndodhet në mesin e tabelës në Serinë A.
Pikërisht në këtë skuadër ndodhet edhe sulmuesi që po i habit të gjithë në Itali, Kuajarela, që ka lënë pas me gola të shënuar edhe Kristiano Ronaldon. Pritet të shihet se cili do të jetë vendimi i Ndojit, ndërsa një kalim te Sampdoria do të ishte vërtet një zgjidhje e duhur, pasi i ofron garanci për qëndrimin në elitë edhe në sezonet e tjera, ndryshe nga Breshia. /Shqiperia.ch/