Izair Emini largohet nga Kukësi, në stërvitje me Shkëndijën e Tetovës

Izair Emini pritet të dalë sot në stërvitje me Shkëndijën e Tetovës. Burime të sigurta të “Panorama Sport” pranë lojtarit, konfirmuan se sulmuesi ka arritur marrëveshjen me klubin tetovar dhe tashmë pritet vetëm lejekalimi nga Kukësi për t’u zyrtarizuar.

Mirëpo, në mes është problemi i kontratës me kampionët në fuqi të Shqipërisë. Sipas drejtuesve të Kukësit, Emini është edhe për një sezon nën kontratë. Vetë lojtari e mohon një gjë të tillë dhe nëse gjërat nuk zgjidhen me mirëkuptim, është e sigurt që do të shkojnë në gjyq.

Emini ka paralajmëruar klubin se do ta padisë në FIFA për parregullsi në kontratë, e cila sipas sulmuesit ka skaduar që në momentin kur skuadra është eliminuar nga Liga e Kampioneve.

Emini ka disa javë që ka arritur marrëveshjen me Shkëndijën, teksa mësohet se ka qenë lojtari i parë që trajneri i ri i tetovarëve, Qatip Osmani, ka kërkuar ta ketë në skuadër. Sulmuesi luajti një sezon e gjysmë me Kukësin dhe arriti të fitojë gjithçka brenda 18 muajve: titull, Kupë dhe Superkupë.

About the author