Shqipëria ka zhvilluar stërvitjen e dytë sa i përket dy ndeshjeve të qershorit që do të luhen ndaj Islandës dhe Moldavisë. Grupi i lojtarëve është i pjesshëm, ashtu siç është raportuar edhe më herët. Së bashku me Kombëtaren A po stërviten edhe shumë lojtarë të U-21, që do t’i bashkohen pas disa ditësh trajnerit Alban Bushi.
Trajneri Reja është shfaqur në humor dhe i qeshur gjatë ditës së sotme, duke transmetuar energjinë pozitive edhe te skuadra. Madje në shumë momente ka pasur edhe shkëmbime humori me magazinierin e Kombëtares, Fatos Kademi. Faktikisht ky i fundit është një nga personat më të vjetër te Shqipëria, që i siguron gjithmonë lojtarëve bazën materiale.
Një lidhje të veçantë miqësore Kademi e kishte edhe me trajnerin De Biazi, shpeshherë duke sjellë edhe skena komike së bashku me lojtarët. E gjitha kjo shërben për ndryshuar gjendjen dhe moralin e lojtarëve, që lënë pas rregullat e ashpra të Panuçit. /Shqiperia.ch/